譚輝智將於今個月二十六日於九展舉行首個演唱會，昨日舉行發佈會吸引過百粉絲到場支持，當然他的父母，太太及一對仔女都現身撐場，他表示，當收到開騷消息一刻嚇到面青青，他說：「心情當然好興奮，記得當刻我人在泰國最後一日收到電話，我還以為係打錯電話搵錯人，我反問對方，我開演唱會？當時我同太太食緊飯，太太都望住我，覺得我塊面青晒，因為我真的不敢相信，自己都覺得太快喇！不知自己是否得，但因為剛參加完比賽又完成《中年好聲音2》演唱會，都怕應付不到，但機會到來，不可以錯過，至少參加完比賽令我會大膽去嘗試。」

　今次演唱會海報更Ｐ圖變一身肌肉，問他會否擔心一除衫就觸犯商品說明條例？他笑說：「我影海報時是有，不過現在無晒啫！不過現在都努力練緊，不過集中在9一的。」至於當晚會否除衫騷肌？他說：「好多人都問會不會擁有這個身材，當然到時先知，但近排我都努力做運動，游水及跑步，除了減壓又可以練氣，現在練到集中一嚿，但我又覺得張海報的身形太大隻，睇完都問自己有無可能？不過演唱會就一定會有跳舞環節。」◇