《TWINS SPIRIT SINCE 2001 LIVE IN HONG KONG》演唱會，昨晨開賣加開的四場，不到一小時，全部售罄！

　如此好成績Twins兩人也十分開心，阿嬌(鍾欣潼)知道消息後表示，「嘩！好開心，我會更努力做好演唱會。依家慢慢瘦緊，我唔想急速減，免得反彈快，哈哈。」

　阿Sa(蔡卓妍）就第一反應係：「下？係咪真架？咁快？當然係開心啦！」問到佢重會唔會加場呀？因為仍然有fans話買唔到，阿sa話，「嘩，真係唔知，睇公司啦，都唔知重有冇期呢？(咁如果真係有期可以加呢？)其實我唔抗拒，經過呢幾年世界咁多變化，有時我會諗，做到就做啦，能夠同一班歌迷一齊係紅館相聚，係好難得，冇人知世界會變成點，日後係咪重可以開演唱會呢？歌迷大個左，我都大個晒…哈哈，之後嘅人生又會係點？會唔會突然間生BB，又或者有家庭，又或者個世界又唔知變成點啦…咁到時又未必可以開演唱會啦，所以依家做每一件事，我都係抱住可能係最後的諗法去做，咁個人又投入d，又更份外珍惜啲。」

　演唱會頭場是阿嬌生日，不少歌迷想同阿嬌慶祝，阿嬌回應，「多謝晒，我諗大家到時先算啦，入唔到場就唔好買蛋糕俾我，因為依家感冒菌嚴重，我地要做十幾場都要好小心保護自己，後台影相我地都停左，唔影住，做晒咁多場先，希望減低傳染，咪做做下病左就麻煩啦嘛。所以歌迷留言祝福我就夠啦，唔好破費，唔好買咁多蛋糕，食唔到呀，要keep靚靚，等完騷之後先可以大吃大喝啦。」◇