相識相交多年，二００九年正式向外公佈已婚嘅汪明荃同羅家英，五月二號度過佢哋結為夫婦後嘅十四周年象牙婚紀念。呢日佢哋置身中環一間知名茶室以傳統粵菜慶祝，仲齊齊大曬婚戒，而原來呢對重製版嘅婚戒，係平時唔聲唔聲嘅家英哥因為婚戒早已失竊，而搵返當年嘅舊相參考款式而重新訂製，難怪Liza姐都大嗌感動啦。

　家英哥同Liza姐喺行內素有地位，不過呢日亦同步放閃，齊齊喺社交平台大曬恩愛，仲趁機會隔空啜啜，真係又甜又閃到眼盲呀。

　家英哥同Liza姐早喺一九九八年相識，之後交往，雖然家英哥多次求婚，但係都未獲Liza姐首肯，直至二００四年，家英哥患上癌症先令阿姐改變想法，到二００九年正式成婚。二０一三年Liza姐位於西貢嘅寓所第三度失竊，當時據報短短二十分鐘就被偷去價值三百萬財物，估計戒指就係當時失竊。◇