陳家樂Carlos Chan去年六月初向女友Shiga Lin連詩雅求婚成功，昨日一對準新人正式對外宣佈四月二十四號正式成婚結為夫婦，又公佈溫馨甜蜜婚紗照，同大家分享喜悅。

　準新人家樂同Shiga聽從家中長輩安排，請師傅幫忙擇良辰吉日舉辦婚禮。為留下更多美好回憶，家樂同Shiga早前就分別喺香港同日本取景拍攝婚紗照。家樂幸福咁話：「呢輯婚紗相有幾個地點，其中一個係我哋啱啱開始拍拖曾經去過嘅一個沙灘，對我哋嚟講特別有紀念意義，所以今次再踏足呢個沙灘一齊睇日落、數星星，重溫當時種種浪漫。」佢哋發放嘅婚紗照中表情都難掩甜蜜溫馨愛意，Shiga左手無名指上仲帶住閃爆鑽戒。

　而原來操刀婚紗照嘅功臣都係各自陪住家樂同Shiga成長嘅多年好友。家樂話：「攝影師係我同學，而造型師就係Shiga嘅好姐妹，整個化妝、髮型團隊足足有廿幾人，陣容強大。」◇