組合艾粒一連四場演唱會日前圓滿結束，尾場好友方力申專程前來捧場，少爺占的兒子也來睇騷。剛自爆已離婚五年的當奴以「黑化蜘蛛俠」造型上台說話時，獲全場歡呼，他激動得沙聲，仍不忘搞笑：「死喇，我係咪中咗（新冠病毒），係咪中咗蜘蛛毒？」尾場四度安哥，全場觀眾亮起手機大合唱《組合》，熒幕播二人在後台感動泛淚畫面，然後出場與觀眾大合照。

　少爺占大爆當奴愛追名牌：「知你係潮人，所以諗住買$8000嘅名牌白色背芯送畀你，最後發現係女裝冇買！」他又指當奴一直介意自己只能坐「潮流界第二把交椅」，大銀幕上隨即播出「第一把交椅」余文樂錄影片段，自己甘願「退位讓賢」，令當奴感動到眼紅紅。

　少爺占有意在明年二月舉行Part2，又在台上又忽發奇想，說準備明年十月開Part3，原來公司已買下十二月尾跨年紅隧口廣告牌宣傳Part2演唱會，至於是否加開Part3？少爺占笑言是忽發奇想，未知會發展如何。談到余文樂的驚喜，當奴形容是無價，很感動。◇