《新春開運王》已經拍攝了第五輯，今年薛家燕冧莊孖學生港姐冠軍宋宛穎同周志康做主持，更請來三位玄學師傅包括李居明、李丞責及麥玲玲，走遍全港，食盡各地美食外，為大家推測運程時，三位師傅異口同聲表示：「大家要嚴陣以待對抗疫情，注意衛生！」

　家燕姐與三位師傅合作無間，咁近城隍廟，梗係求番支好籤啦！屬虎的家燕姐今年雖然本命年犯太歲，但三大師傅贈言家燕姐來年運程皆唱好！

　李居明指家燕姐新抱呢兩年容易有喜，李丞責就指家燕姐來年會攞獎或攞勳銜，事業更上一層樓，而麥玲玲則指她家宅富貴平安，更送贈富貴竹予家燕姐，家燕姐笑言：「承佢哋貴言，虎年我犯太歲，但佢哋睇過我個大運應該冇乜問題，只係可能會有小毛病，玲玲師傅叫我小心關節。」

　三位師傅帶家燕姐及兩位主持食盡香港美食，家燕姐話：「三位師傅好豪氣，帶我哋食香港世界名菜，日本、德國、越南，甚至去西方寺食有機齋菜，好多我都未食過，所以我拍呢個節目起碼肥咗五磅，不過好開心，有美食之餘，仲學到玄學上自身嘅嘢，三位師傅仲派虎年運程書俾台前幕後。」

　而家燕姐大讚學生宋宛穎表現出色，家燕姐話：「宋宛穎好勤力、口齒伶俐，又有禮貌，有幾位嘉賓都讚佢唔似一個新主持，好有經驗咁，其實佢係初次做，我欣賞佢學習態度，正如佢以前細個好專心、好熱誠，又靚女，今次好得意，我兩個拍檔都係孖胎，周志康又係孖仔，宋宛穎又係孖，哈哈……都係難得嘅事。」◇