【特訊】周四凌晨德國盃第一圈賽事，拜仁慕尼黑作客第五級聯賽球隊不萊梅SV大開殺戒，多名國腳級球星壓陣之下大勝十二比０，其中喀麥隆前鋒祖普莫亭更加食出「大四喜」，同時上演助攻「帽子戲法」，直接間接製造七個入波！

　雖然對手不萊梅SV陣中無任何職業球員，不過拜仁今場仍然出動湯馬士梅拿、甘美治、利萊辛尼等球星正選上陣，祖普莫亭上半場已經連入三球，加上梅斯亞拿入波同對手擺烏龍，半場領先五比０。半場休息期間湯馬士梅拿、甘美治都退下火線，但進攻意欲全無降低，下半場再入多七球，埋單大勝十二比０。

　拜仁慕尼黑自一九六五年升上德甲後，今場是球隊在各項賽事第二大勝仗，僅次於一九九七年德盃十六比一狂數DJKWaldberg。三十二歲祖普莫亭雖然要做利雲度夫斯基後備，但他每次上陣都交足課，這位前鋒賽後說：「無論上陣時間多或少，最重要就是有機會上陣要好好把握，今次是我職業生涯第一次入四球，實在非常美妙。」◇