蔣家旻、朱敏瀚前日在中環街頭拍攝新劇《換命真相》時，竟然巧遇周潤發（發哥）﹗蔣家旻雖然身體不適，頭痛又皮膚敏感，見到發哥竟立即不再頭痛，自言「成個人醒咗」。

　蔣家旻在社交平台分享與發哥、朱敏瀚及眾幕後手足的合照，她留言︰「因為噚日外景，之後就偏頭痛到呢刻，唔想靠藥止痛，唯有痛住再0六通告。又因為噚日唔知畀咩咬到，今朝發現左邊面敏感，又紅又痕又大撻，搞到心情差到真係講咗粗口，妝都唔想化（大佬！靠樣搵食㗎嘛）。

　當外景地點就係皮膚科醫生嘅診所附近，難得中間有break仲要急忙約到睇醫生，突然覺得自己好幸運，要為小事感恩時，偏偏無諗過就發生一件大事！超幸運！

　唔使行山都見到發哥！發哥呀！今次仲唔到我集郵！成個人呆咗，興奮、心跳加速、成身熱咗、紅都面晒！就係咁，頭痛短時間停咗，成個人突然醒咗。今日嘅通告係值得㗎！感恩感恩！多謝發哥！#換命真相#唔好羨慕我哋#發哥可唔可以返嚟幫我醫頭痛」。◇