寰亞音樂唱作歌手鄧小巧在加拿大閉關埋頭苦幹逾月後，帶着她的手信最新單曲《與人同行》回歸香港和歌迷見面，雖然在加拿大與眾隔離期間感覺不易適應，但卻觸發小巧寫下這首助人掙脫傷痕的歌，真不愧為「治癒系」歌手。MV更找來應屆香港電影金像獎最佳美術指導張兆康負責美術，現場一堂比板間房更細小的籠屋場景，實在令人嘆為觀止。

　對於自己這段時間的經驗，小巧這樣形容說：「喺加拿大與眾隔離呢段期間，令我更加集中精神全力做歌，開始時我同製作團隊開會，話想將過去一段時間對生活嘅感覺記錄低，結果寫低咗《與人同行》呢首歌，我覺得這首歌俾你有一份溫暖，但當中又有啲孤單，係講唔到出口嘅。今次導演麥曦茵搵咗今屆金像獎最佳美術指導張兆康（得獎電影《花椒之味》）負責MV嘅美術，我一到現場，見到成個場景好仔細，真係嘆為觀止，配合幾位年輕演員陳漢娜、林耀聲、盧鎮業、黃溢濠嘅演出，好觸動到觀眾。」

　說到歌曲的意念，小巧形容這是她和歌迷的真實互動，誘發她有這個想法，她說：「記得幾年之前我攪咗一個《WhatsApp鄧小巧》活動，開咗一個手機號碼，俾歌迷留言同我分享佢哋嘅故事，講吓心事，好感恩佢哋願意將自己咁脆弱一面同我分享，原來對人歡笑背人愁嘅生活係真實咁存在。正因為這個活動，啟發我寫了《與人同行》，因為我們都以為傷痕太多，可以傾訴嘅人太少。雖然唔係每一個人都住喺籠屋，但心理上某程度好多人都被困喺一個籠屋，冇辦法掙脫過去嘅傷痕，背負好多秘密，而一直被困喺一個破爛嘅地方，自己關埋門，只有自己知道，迷失喺生活節奏咁繁忙急促嘅城市入面，我寫呢隻歌就係想講叫人有唔開心嘅事，要識得搵人傾訴。」

　小巧提到，今年的新專輯希望可以做到全部歌曲由她自己親自填詞，以完全反映她最個人的心路歷程，而之後她在社交媒體上，也寫上一段文字表達她與生活共融的想法，她說：「生活被痛苦踐踏，也許未能理解互相的痛楚，但起碼我們可以與人同行，互相分享痛的養份。我們有很多自己的痛，也有共同的痛。活在這城市，我們用痛聯繫著，我們在絕望的境地下努力抱有希望繼續生活。謝謝導演和演員們，把我們活在這每日被惡夢輾過的創傷後遺，如此切膚地表露。我們有口難言，傷痕滿身，又或在家中孤立無援，工作麻木而又疲憊。但我們要相信，我們可以與人同行，我們有人同行。也許我們跌倒過，但我們也努力過。」◇