無線花旦朱晨麗（朱朱）主演新劇《大醬園》正在熱播中。她與緋聞男友何廣沛戲中感情線日趨白熱化，二人終「有情人終成眷屬」，朱朱「下嫁」廣沛後將陷生死邊緣，誕下二人的愛情結晶品！

　結婚一日洞房後丈夫何廣沛就失踪，朱朱同何廣沛只能做一日夫妻就要守生寡？朱朱只肯劇透少少：「只可以透露小滿（朱朱飾）幫楓少（何廣沛飾）生咗個好可愛BB，其他劇情大家自己追啦，因為疫情好多人每晚都留喺家中追劇，我依家每日都留喺屋企唔敢出街，劇中只拍咗我生仔，冇拍坐月，感覺好似喺現實生活中畀我體驗下坐月，哈哈！希望疫情快啲過去，社會快啲恢復正常。」

　談到拍產子戲，朱朱大讚幕後製作今次相當認真：「BB其實係道具嚟嘅，但係造得幾可亂真，無論皮膚同毛髮，仲加埋出世時血漿，真係好迫真！」完全沒有生產經驗的朱朱事前上網睇片「學習」：「自己真係冇呢方面嘅經驗，所以一定要做功課。今次真係發拍晒成個生產過程出嚟，我就全程係咁嗌，結果搞到第二日聲都沙晒。」

　朱朱笑指自己將BB抱在懷裏，相當感動：「真係眼濕濕㗎，完全體驗到母親的偉大。我自己其實好鍾意小朋友，希望有朝一日能夠經歷女性人生嘅另一階段，懷孕生子，擁有自己嘅血脈。」

　因為疫情仍留在蘇州自我隔離的朱朱做足市民責任足不出戶，日前情人節朱朱全日留在家中度過，約埋一班粉絲在網上一齊追劇《大醬園》，她開心說：「同fans喺網上一齊過情人節，都好難忘。雖然仍未播完，已經開始唔捨得，拍咗差不多五個月，同大家相處好開心，好有默契，尤其係萬家，希望有機會再聚再合作啦！」◇