鄧月平（Larine）參與的viuTV煮食綜藝節目於今日首播，賽前不少人都以為Larine人仔細細，何來似個廚師？但其首集表現已相當驚艷。

　原來Larine六歲時已開始炒菜煮飯，所有家頭世務都識處理，這都源自家人教導，

　獲得鄧媽媽真傳，Larine說：「我諗大家唔會覺得我識煮嘢食，其實我六歲開始，媽咪已經叫我入廚房幫手，切吓餸煮吓嘢食，因為屋企人覺得小朋友獨立係由細培養，所以屋企嘅家務同瑣碎事好似縫紉、簡單木工，爸爸媽媽、外公外婆都有教我做，佢哋覺得我將來作為一個賢淑嘅太太，係必須要識嘅。」

　到了有機會在《辣伙頭》展示廚藝，初時Larine沒甚麼準備，依照平日的烹調水準參賽，豈料比賽的測試愈來愈難，「要煮一啲從未食過都唔知咩味嘅嘢、煮一啲從未煮過嘅嘢，咁我就事先喺屋企搵啲食譜搵啲靈感試煮，真係唔得嘅話就去問吓朋友偷吓師，同埋而家網上好多食譜、製作方法、調味配方好齊全，跟住整都會有唔錯嘅效果。」

　首集參賽者之一的洛兒煮到失火，Larine竟然奇異地唔怕熱又唔怕火，一手幫對方拎開着晒火的煲，在旁工作人員卻嚇到碌大眼，Larine說：「當時洛兒切緊嘢冇顧到個煲，咁啱我同佢同一張枱，我喺隔離見到佢冇反應，情急之下伸手幫佢攞開隻煲，希望令到個煲離開熱力，唔好個火愈燒愈大，然後Christian（主持楊尚友）用煲蓋整熄個火，最後都安全，拍攝都冇出咩意外。」

　第一集發生洛兒失火事件，Larine即時勇救；其後有次Larine又幫另一位參賽者切帶子，結果左手手掌中刀收場，「我幫佢開帶子時太急啦，成把刀隊咗落手，當下我見有啲血飛出嚟，就即刻用紙巾包住隻手，然後不斷換紙巾，因為傷口都幾深，到煮完係成個比賽冇人發現我受咗傷，我係隠藏得非常好。」◇