鄧月平（Larine）之前為拍陳果作品《墮胎師》，由一百零一磅夾生谷肥至一百四十三磅，兩個月的極速增肥，包括瘋狂食唔停，食物唔肥唔放入口，一日六至七餐是必需的；睡前的消夜有cream、雪糕、junkfood，而早餐更豐富，一瞓醒可以係麻辣火鍋，餘下食材做炒飯，留番lunch繼續食。

　一個月下來，Larine已經明顯感受肥胖來襲，她說：「身形係同之前有唔同，開始有好多唔方便嘅時候，衫真係着唔落，都要買過晒。我記得拍《墮胎師》嘅時候係夏天，我哋去咗一啲幾熱嘅地方取景，但我要keep住食唔好俾磅數跌得太快，因為我係一拍戲就會瘦嘅體質，由於我嘅角色係個肥、智商有啲問題嘅女仔，唔可以瘦，加埋天氣又熱又侷又食唔落嘢，但又要夾硬食晒啲飯盒，全日盡量食，其實幾辛苦。」

　戲中，Larine是個壞腦肥妹，四處呃呃騙騙，導演陳果特別要求她增磅、帶眼鏡、拎柺杖來配合角色，並以肥妹學生妹造型影海報，以上種種，對年僅二十二歲的Larine來說確係極大挑戰，肥肥瘦瘦的辛酸亦不足為外人道，Larine表示：「喺成個增肥過程中，我媽咪見到我肥到咁係有喊過，通常媽咪都係叫仔女食多啲嘢，但拍完套戲後，媽咪唔俾我食嘢，話你真係唔好再食、你真係好肥，初頭我持咗自己青春冇嘢驚，但之後開始荷爾蒙失調，結果仲用咗好多時間調理身體。」

　雖然犧牲甚大，但Larine還是很喜歡這個肥妹仔角色，「我記得影后曾美慧孜講過戲比天大，我覺得我終於有個脫胎換骨嘅鄧月平俾大家見到，只係當時增肥好低調好保密，令好多朋友以為我要退出娛樂圈，仲問點解我自暴自棄搞到咁肥。」◇