鄭世豪近日推出新歌《等得太久》，今次翻唱彭羚經典的一曲，世豪表示：「揀選啲以前有聽過而又好觸動到我嘅歌曲去唱，當中以唔同人與人之間嘅感情挑選。之前推出咗首《誰可相依》，係講兄弟手足之間嘅一啲真摯感情，大家聽後好喜歡呢方面既改編。今次呢首歌翻唱了我很喜歡的彭羚的《等得太久》，係講情侶之間嘅感覺，希望大家可以重新重溫呢啲好聽既歌。」

　不少世豪的歌迷都表示歌名是他們的心聲，一直都等待世豪的新歌，終於等到了。世豪笑言：「如果比較細個嘅粉絲可能會當新歌聽，所以我都特別搵兩位好朋友幫手拍咗個MV，令成首歌有耳目一新嘅感覺。」今次MV女主角正是《愛．回家之開心速遞》入面合作的「垃圾清」周梓盈，他表示：「梗係唔會搵我老婆雷珍妮（陳偉琪飾），佢成日鬧我話我死蠢，唯美畫面即時冇晒！哈哈！今次搵梓盈，係因為劇中大家合作得愈來愈多，特別係佢同我細佬龍力王Terry（李健健飾）有感情線之後，大家都愈來愈熟落，咁我就主動邀請佢幫手，佢就一口答應。」

　不過男主角既不是世豪本人，亦不是李偉健，世豪說：「我無理由搶細佬女友呀嘛，太亂唔好呀！所以我邀請咗陳俊堅，佢係舞蹈員出身，之前兩次幫我嘅歌排舞，合作過，覺得呢個後生仔真係好好！後來佢由跳舞再訓練成為幕前演員，在《她她她的少女年代》亦有好亮麗演出，有次同導演傾開，傾傾吓就促成今次合作。」

　世豪表示歌曲有少少悲傷的情節，拍攝MV時，梓盈要向大海呼喊又要跪地，非常投入，世豪說：「當日真係辛苦晒兩位，特別係梓盈，要跪地跪好多次，又要喊好多次，不過出嚟個效果好好，希望大家鍾意呢個MV！對兩位付出真係無言感激！希望之後歌曲有好成績，請晒台前幕後食餐好嘅！」◇