十二月，王梓軒舉行入行十周年演唱會，距離開騷唔夠兩個月，梓軒馬不停蹄忙於綵排外，每星期仲會抽四至五日操肌，連瞓覺時間都唔夠，無非想派福利畀入場觀眾，梓軒話：「我而家胸肌已經掙爆啲衫！」

　為演唱會操弗，梓軒話：「要嘅，唱歌嘛，有啲動作要，加上我演唱會後有個音樂劇，緊接嘅，所以想操弗啲。我想介紹下我呢幾個月嘅教練，炮台山第一健美男阿Man，係頭號健身殺手，好榮幸可以喺佢嘅教導下操練，我哋set咗個fitnessgoal畀自己，除咗強壯、體脂低，仲要成個人乾身啲。（壓力大嗎？）會㗎！驚表演失準，瞓得唔好，所以我朋友介紹我飲鹼性水，平衡番個PH，食嘢唔定時或者太攰，個人會酸，唔係妒忌嗰啲酸，心肺好啲個人都精神啲。」

　教練指與梓軒訂下目標：「佢有演唱會，就想個身形好啲，例如有啲位置想大嚿啲，個腹嘅線條好啲，但又唔可以硬崩崩，同佢開始咗兩個幾月嘅training，期間見到梓軒非常勤力，佢工作好忙，我約佢嘅時間好早，我開頭接觸佢有少少顛覆咗我嘅諗法，我就諗一個Artist夜晚有好多應酬，或者活動，咁早嚟唔嚟到？但佢都嚟到操練，我畀指示佢，佢都做得足，食嘢又食得清，佢每一日都只可以飲水，其他嘢都唔飲得，佢比啱啱嚟肉量多咗，長咗肉，但體脂下跌。」梓軒笑指：「我嚟嗰時十四，而家十一，但我個goal係九。」

　但教練就嫌佢瞓得少：「佢太多工作，每次嚟都瞓得少，要再多啲休息時間，對身體再recover會好啲，希望佢可以爭取多啲休息時間……」◇