熊黛林（Lynn）一身白色高貴長裙，出席醫美概念店開幕活動。啱啱過咗三十九歲生日嘅Lynn與老公郭可頌撇下孖女Kaylor與Lyvia，去瑞士拍拖旅行慶生。被問到老公有無準備到生日驚喜慶祝，Lynn就表示，「生日前一日返到酒店房見到有花有香檳，老公以為我識穿咗，佢要同我慶祝生日。其實我當時實在太攰了，朦朦地，所以我完全唔知發生咩事，而正日生日就同一班朋友食飯慶祝，突然有人送上蛋糕，好驚喜」。

　問到兩個囡囡送咗啲咩生日禮物，Lynn透露囡囡夾埋送咗份「厚禮」，佢話：「嗰日阿妹做錯事，我就話咗佢兩句，家姐聽到以為我鬧阿妹，走過嚟打咗我一把，之後我問家姐，做乜嘢事打我，阿妹見到以為我鬧家姐，又學家姐打咗一巴」。◇