入行十年的楊潮凱，月前宣佈離開大台往外闖。

　離巢後已馬上為音樂微電影擔當男主角、監製和劇本創作，和張紋嘉合唱《狠心放心》，更為電影《喜歡你是你》做導演，新嘗試豈止這些？楊潮凱早前獲攝影師邀請，遠赴檳城取景，影一本紀錄楊潮凱這刻狀態和想法的寫真集《Go With The Flow》。

　邀請至落實寫真只有數天時間，再到出發檳城不到一個月，年初已為拍攝《法證先鋒IV》而增肥，潮凱要在短時間減磅，壓力大之餘，身體適應亦是一大問題。「我當時嘅身體狀態係完全唔適合進行拍攝，我好驚影出嚟嘅效果未如理想，但我深信呢個係天父畀我嘅一個鍛煉。二十幾天過去，我由一百七十磅減到一百四十四磅，雖然我都認為呢一個唔係我身體最fit嘅狀態，但我真係問心無愧。」

　寫真《Go With The Flow》大部份概念都來自潮凱，原來他在攝影師邀請前，已有想過出相集，「我自己都好鍾意影相，喺電視台咁多年，其實我都影埋唔少相，之前都有構思過出相集，不過望住一大堆無乜整理過嘅相，加上有啲版權問題要解決，所以都仲未實行，突然Ronald（攝影師林子賢）問我有無興趣出呢本書，所以我考慮咗好短時間就應承咗。」

　在檳城短短逗留六天，和攝影團隊由不相識變成好友，當中笑料不斷，例如要影胸肌前當眾做掌上壓谷肌；本身無打算淋水的場景卻又因覺得啱feel而即場濕身。「本書唔會以賣弄肌肉行先，不過都明白肌肉、性感係不能缺少，當中有一輯著住泳褲喺泳池嘅相。呢輯相我自己幾鍾意，一嚟未影過呢類型嘅相，二嚟同團隊嘅合作好好，可能全男班嘅關係啦，完全無尷尬無唔好意思，因為大家有嘅嘢都一樣嘛！」◇