邱禮濤執導,劉德華監製聯同古天樂、苗僑偉、林嘉欣主演,陳家樂、衛詩雅、周秀娜、應采兒、MCJin、恭碩良等參演的《掃毒2天地對決》將於七月十六日正式上映,而兩位影帝劉德華、古天樂首次為電影合唱主題曲〈兄弟不懷疑〉,古仔更大讚華仔攞足一百分!
雙雄首次合唱,可算是為音樂市場上注入新力量,古仔先笑言:「咁大件事?咁都好可歌可泣啦喎!唱歌我業餘嘅啫,唔好咁講。」華仔聞言也笑說:「我都係業餘到而家!哈哈!諗番起對上一首剛陽味重嘅歌,都好多年前同偉仔嘅〈無間道〉,所以而家市場上都需要番啲男性嘅音樂同歌曲。」華仔有大量音樂作品就不在話下,唔知華仔有冇聽過古仔嘅音樂?古仔笑笑反問:「華哥有冇聽過我啲歌呀?」華仔即說:「有!我都聽過好多,但真真正正講個歌名出來真係幾難,哈哈哈!在錄音過程中,知道古仔會擔心自己做得唔好,但佢睇少咗自己,事實佢上佢做得好好!我幾鍾意佢唱『關係』個段,大家留意下!」古仔聽到要為對方評分的話,他立即笑說:「咁我一定係零分,而華哥就一百分!」
《掃毒2天地對決》主要講述雙雄之間的兄弟情,〈兄弟不懷疑〉的歌詞是出自監製及主角之一的劉德華手筆,問到華仔為這份詞寫了多長時間?他說:「確實寫咗幾耐真係唔記得,寫咗幾日吧!寫嘅時候腦內畫面諗住同古仔之間嘅兄弟情、亦有我自己戲內同其他兄弟之間嘅兄弟情!其實份詞主要係想講,大家兄弟之間好客氣,有啲嘢一早講出來就冇事,但大家就係點都唔會講!最後就會懷疑大家,之前嘅感情就會變質。」對於歌詞有冇畀意見,古仔就話:「佢地有畀份歌詞我睇,我第一個反應係:唔好玩啦!我都唔識唱歌,點畀意見啫!」
至於問到在錄音時分別腦內想像甚麼來投入感情,古仔表示:「諗起最後Ending在地鐵內嘅畫面,十幾年嘅兄弟情,因為大家唔肯聽大家講嘢就冇咗。」◇