張建聲新片去盡大犧牲 偷食撻落水撞崩半隻牙

 由張建聲(Justin)夥拍日籍性感女神松岡李那和何珮瑜(Jeana)主演的「向西」三部曲驚慄最終章《作家的謊言:筆忠誘罪》,

 這部以男人偷食、小三正面挑釁正印為包裝的懸疑片已定於六月二十日正式上映,早前電影舉行優先場贏盡口碑,所以今個周末及周日將再接再勵繼續開優先場,一眾演員亦會謝票造勢。

 拍戲不嬲去到盡的Justin今次在新片又大犧牲,他飾演一名有錢作家,同老婆Jeana及囝囝一家三口生活富泰安穩,但因為偷食樓上租客松岡而飛來橫禍。片中有一幕戲講述他和松岡在泳池相遇,但在試位期間不慣撞埋池邊,當場撞爆半隻牙,Justin忍住痛仲以崩牙上陣拍攝,他說:「當時撞到牙梗係痛,但橫掂都係,我直情將撞崩牙放埋落段戲入面,因為場戲係話我掛住影相唔小心跌落水,所以成場戲係好真實,到嗰日拍完之後咪即刻搵牙醫補番。」

 除此之外,基於作家的角色性格,加上之前Justin本已增肥拍《真‧三國無雙》,故他索性保留「張飛」的肥底身形拍《作家》,極具增肥經驗的Justin更肥到一百八十六磅,比其正常磅數肥二十五磅,搞到臉又圓又肚腩突突;至於飾演師奶的Jeana在Justin鞭策下日食夜食,終於谷肥十五磅,由往時臉尖尖變pizza臉,兩人一齊變成圓潤夫妻。

 如今Justin體重已減十磅,「呢排要keep住做gym做運動,想操番大隻啲,體重減番啲,仲未達標呀,因為早排去旅行又肥番,要勤力番啲再操吓。」至於Jeana就因為骨架細,加上女仔又貪靚,特別有意志,故電影煞科後兩個禮拜已火速減肥成功,回復昔日纖瘦體形。◇