Nancy Wu Ting Yan10月初無預警地喺社交平台貼出婚照，表示自己與醫生陳健華於新西蘭圓婚，正式成為人妻。由於定欣對婚禮相當口密，就連胡說八道會嘅幾位姐妹都係喺定欣PO婚照後先知道，早前胡杏兒Myolie Wu出席活動時，就透露媒體呼籲定欣好快啲搵佢。

　對於好姐妹嘅呼喚，定欣終於作出回應，日前就就約咗胡杏兒與老公、 陳山聰同太太、袁偉豪與張寶兒、胡蓓蔚同單立文一齊相聚。席上杏兒為好姐妹送上一對巨型龍鳳鈪，並即場為對方帶上，搞到定欣感動到眼泛淚光，佢喺帖文中寫道：「好姊妹果然係講得出做得到，佢真係打咗對龍鳳鈪俾我做禮，無論金價有幾高，我都會好好收藏！Thank you Sis!~ 」仲搞笑咁話下次要戴住出騷。而杏兒亦留言回覆：「能夠親自幫妳帶起哩對龍鳳鈪，我真係好欣慰！」

　除咗曬出龍鳳鈪外，定欣另一個post就同咁多位好友道歉，原來定欣為咗搞婚禮而缺席山聰嘅生日，又冇回覆袁偉豪嘅短訊，佢喺帖文中寫道：「呢班村民太了解我，陳山聰生日又話嚟唔到，Uncle Ben的Message又唔覆，一定係有啲嘢係呀！咪就係岀嫁囉，終於可以同你哋分享啦！多謝大家體諒我如此口密!~」而眾好友就喺呢個post下留言祝福，其中張寶兒仲留言話：「下次要不要輪到袁咕碌滾床單服務？祝陳生陳太百年好合！幸福舒心！◇