藝人泰臣執導天主教聖瑪加利大堂一百周年舞台劇《百年人海》日前正式公映，除不少神父到場支持外，該劇顧問劉松仁亦都低調現身支持。松哥婉拒上台謝幕，但完騷都到後台為眾演員打氣。

　泰臣表示劉松仁前輩不願搶風頭，所以連旁白都拒絕聲演：「被松哥拒絕咗啊，不過人生中可以畀前輩拒絕嘅有幾多個？畀松哥拒絕都係我嘅成就嚟！劇中我都偷偷剪咗佢以前啲片劇出嚟，聽到啲觀眾好有反應，唔知佢會唔會嬲，搞到我唔敢望佢！」

　首場演出後，泰臣表示鬆一口氣，表示想再任舞台劇導演崗位：「我見到台前幕後一齊向目標出發，大家付出都有價值，聽到觀眾嘅參與都好開心！」◇