雨僑前日早上誕下與羅力威的愛情結晶品Ｂ女Harper，母女平安。Ｂ女的出生日期係八月八日早上八時，三條八易記又好意頭，雨僑就表示：「ＢＢ係八月八號朝早八點開刀生，不過都真係咁啱，我哋冇特別揀，係醫生呢日得閒就揀咗呢日。好順利出世，六磅ＢＢ，好健康，好快就生咗。」

　雨僑和阿威首度榮升父母，在疫情下迎接小生命降臨，的確難忘，阿僑亦說：「比較深刻係喺疫情底下會有好多不便，但對我嚟講係一個特別回憶，咁又唔係真係好麻煩，都係入院之前因為都未有咁多政策，要喺私家醫院做深喉唾液樣本，攞咗個報告先有得入院，先生有得陪產，但陪完要即刻走，冇得喺病房照顧，每日探病都係兩餐送飯時間，冇得長時間陪，所以都同我一直預想生ＢＢ嘅境況有啲唔同，但係我覺得為咗我哋、醫護同其他病人嘅安全，呢啲處理都係好恰當，所以我哋都好配合，其實醫院都照顧得好好，老公嚟玩下ＢＢ、抹下汗就ＯＫ，反而我都仲輕鬆啲，因為醫護照顧更加專業，我老公有陪產但冇剪臍帶，我哋一家人都非常開心。」

　問到羅力威有否剪臍帶？他表示沒有，因為他全程看着雨僑，「全程望住、陪住老婆冇行開過，冇特登行過另一邊剪。」看到囡囡第一眼時，羅力威表示很感動，但沒有喊，「當然真係好感動，但同時都好緊張，亦都要陪住太太，因為就算麻醉都會驚，驚佢會驚。」問到囡囡似自己還是雨僑？羅力威說雖然雨僑認為囡囡比較似他，但他笑說暫時兩個都唔似，「一開頭睇超聲波片我覺得係似似哋我，但出咗嚟之後又唔算特別似，兩個都唔特別似，哈哈。」至於如何獎勵老婆，羅力威說暫時最重要是讓雨僑身體復原，「冇話獎唔獎勵，我會好好咁照顧佢等佢復原，總之唔好為佢添任何嘅辛苦啦，等佢最輕鬆，等佢快啲好番，同佢可以食番多啲好嘢。」

　雖說沒有特別獎勵太太，但羅力威透露特意為太太及囡囡買了車，「因為疫情關係，帽同口罩都冇適合ＢＢ嘅size，ＢＢ又唔可以遮塊面。始終而家嘅交通工具我哋都唔係超級放心，加上為咗方便老婆同ＢＢ，買咗架車就會安全啲、安心啲。」果然是廿四孝老公兼爸爸。◇