林盛斌（Bob）在hmvod於本月十四上架、原著鄭健和的粵語版3D動漫連續劇《西遊》中，聲演家傳戶喻的人物「豬八戒」。呢隻肥豬予人印象向來又懶又懦弱，Bob被問到以聲音演繹時會不會好考功夫，他卻說呢隻豬係不一樣，「豬八戒鍾意女，鹹鹹哋濕，呢樣同我差唔多，佢內心有啲軟弱，但錄音時其中幾集嚟晒料，做一個好勁好勁嘅強人，我係從來未見過咁威武嘅豬八戒。」

　配音當日，老闆蕭定一到場探班，兩人互有交流，蕭定一提議Bob將角色加鄉音，Bob覺得效果非常好：「佢話豬八戒不如加小小鄉音，有啲黐脷筋，『大師兄』講『大師哼』，令到角色得意啲、立體啲，同其他主角有啲唔同。」他更笑言《西遊記》中個個人物都想做，但豬八戒係最得意嘅，「今次《西遊》入面我一定係做豬八戒，因為豬八戒個老婆好靚，身材好好㗎。」

　《西遊》各人物耳熟能詳，至於今次為何選中Bob聲演豬八戒，Bob笑謂沒有問過原因，但有件事他就很感恩：「而家有工開，做配音工作我又鍾意，以前自己做電台都係用聲音做嘢，又配過西片、港產片、日本電影，今次配《西遊》感恩係早幾年有機會認識李居明師父，佢話阿Bob，你一定要做啲嘢同豬有關，你條命嚟，如果有機會做豬嘅嘢你會發，好掂㗎啦，最好拍《西遊記》做豬八戒。呢件事成日喺我腦入面，幾時有機會做《西遊記》同豬八戒呢？點知蕭定一突然打嚟搵我做豬八戒，嘩，今年行運啦！」

　此外，Bob在配音開工期間隨大隊叫外賣飯盒，點了一盒芙蓉蛋飯，提到現在實施的二人限聚令、晚餐無堂食，會否無啖好食？Bob覺得對自己影響不太大：「我少喺出面食，拍嘢有廠有地方，唔使去到街度食，限聚令對我冇乜大意思，啲人話我屋企咁多人係咪要分幾枱？其實呢段時間好少出去食飯，又冇咩大分別，都係留喺屋企，咪諗啲嘢畀細路玩，應該唔使匿去廁所咁慘，實搵到地方嘅。」◇