羅力威昨日（二日）一連推出兩首風格截然不同的新歌：《旅行娃娃》及《廢物女友》。《旅行娃娃》由羅力威作曲，方浩權填詞，Dash譚健文、羅力威及樂隊Pandora一同編曲，Dash與羅力威聯合監製。歌曲中男主角雖然不捨女友獨自遠行，但最後也尊重女友想法，放手讓她追逐未知的世界，只希望「旅行娃娃」能代替自己一直陪着她到處闖蕩，自己則做她最強大的後盾，在家中備好熱茶，讓她覺得疲倦時，知道有個人在默默地等候她，隨時做她的避風港。

　問到羅力威會否讓老婆雨僑獨自遠行，他表示二人認為一起去旅行才是最開心，如果撇下另一半很沒意思，「雖然仲有啲貓陪住，但係喺屋企做晒嘢，想睇吓電視、食吓嘢都冇人陪，好空虚，真係會好掛住對方。我哋去親旅行都係一齊去，因為我哋覺得永遠都係一齊去先最開心。試過因為工作而單獨咁去，當然大家係非常之唔捨得，大家都會好掛住對方。」

　而另一首新歌《廢物女友》同樣由羅力威操刀作曲，填詞則找來陳智霖，樂隊Pandora編曲，Dash跟羅力威聯合監製，歌曲節奏輕快，是羅力威較少嘗試的曲風。羅力威解構「廢物女友」並非鬧對方是廢物，只是對方將自己最單純、最真實、最直接的一面展示於另一半前，並非你當初認識她那個優雅漂亮女神的模樣。

　至於老婆的「廢物」一面，羅力威直言是一些生活的小智慧，「佢喺其餘嘅事情都好聰明，但係欠缺日常小智慧，可能就係自己照顧自己得唔太好。我自己喺呢一方面比較優勝，譬如人哋會成日唔記得嘢、會撈亂嘢、唔見嘢，我通常會幫佢搵番晒啲嘢出嚟、唔會唔記得熄燈等等。」他更笑說現在自己照顧得懷孕中的老婆非常周到，「老婆而家呢個階段當然係會好辛苦，自己能夠做嘅乜都做晒，家頭細務唔駛講，完全唔會去加添佢任何負擔。佢個肚愈嚟愈大，身體可能會出現狀況，抵抗力又會弱啲，會盡力唔好令到佢有任何嘅『Ｅ郁』。」絕對是廿四孝老公。◇