惠英紅「講得出做得到」 鐵探收視破33點絲襪套頭找數

 有影后惠英紅坐陣嘅無線劇集《鐵探》由開播到大結局都一直叫好叫座,紅姐飾演嘅奸角「萬晞華」奸到出汁,成功令一班觀眾對佢又愛又恨。早前紅姐就誇下海口話如果《鐵探》收視有三十三點,佢就用絲襪笠頭喺鬧市快閃。

 而在(二十日)TVB公佈《鐵探》大結局收視,果然成功突破三十三點,紅姐開心之餘亦講得出做得到,兌現承諾。(二十一日)一早佢就開Live透露自己即將喺某個地鐵站頭戴絲襪快閃!面對自己即將要進行嘅「壯舉」,紅姐都話自己好激動、腎上腺素飆升!而一個鐘後紅姐嚟到地鐵站,又再開Live,用鮮藍色絲襪笠住頭嘅紅姐一出現就吸引晒周遭群眾嘅圍觀,夠晒爆啊!不過就咁戴住唔夠挑戰性,紅姐走埋入麵包舖買嘢,令一班店員都嚇一跳以為有人打劫!估唔到紅姐咁玩得喎。◇