謝霆鋒唔慣同人講心事 自己事自己處理

 最後一集《鋒味前奏》,謝霆鋒繼續炮製上集未完成嘅乾炒牛河,而火火、劉翁兩位徙弟就繼續發問各種問題,火火先問霆鋒如果唔開心會搵吳彥祖定馮德倫傾訴,霆鋒話自己並唔係會同人講心事嘅人:「無咩事係解決唔到㗎,咁大個人就係知道咩都會過去㗎啦。」

 乾炒牛河一上碟,三人立即起筷食得相當滋味,劉翁大讚:「你用電子爐都可以炒到咁,用火爐就仲勁。」霆鋒都表示認同指用電爐始終差啲鑊氣。去到最後一集,火火問師傅對於今輯《鋒味》有咩感覺,霆鋒回應:「今年只不過係第五年,好多嘢都要堅持,我好希望可以無論音樂又好、電影、美食,做人都好,大家都一定要慢慢堅持,無可能做唔到。」而講到仲有咩菜式想試整,霆鋒就話乜都想學、想試,所有嘢都有進步空間,就例如佢現時研發緊一個浸熱水就食得嘅稯,唔使好麻煩咁重新起一個蒸爐。講到上年霆鋒形容自己係bunsen burner,係一團藍火,好高溫好集中,今年又係一個點樣嘅霆鋒呢?

 霆鋒表示希望自己今年各方面都會踏入白熱化階段,「未敢話係一種激光,但希望日後可以變成激光咁聚焦、集中。」◇